Dearest Father by Franz Kafka
Translation: V. Revikumar
No. of Pages 96
Price Rs. 140
കാഫ്കയുടെ ആത്മകഥാപരമായ രചനകളിൽ ഏറ്റവും പ്രധാനപ്പെട്ടതാണ്‌ മുപ്പത്താറാമത്തെ വയസ്സിൽ അദ്ദേഹം തന്റെ അച്ഛനെഴുതിയ ഈ കത്ത്. അച്ഛനെ പ്രതിസ്ഥാനത്തു നിർത്തിക്കൊണ്ടു ചെയ്യുന്ന ഈ ദീർഘവിചാരണ അച്ഛനു കൊടുക്കാനായി കാഫ്ക അമ്മയെ ഏല്പിച്ചുവെങ്കിലും അമ്മ മറിച്ചു ചിന്തിച്ചു. അങ്ങനെ അതൊരിക്കലും അച്ഛന്റെ കൈകളിൽ എത്താതെപോയി. അച്ഛന്റെയും മകന്റെയും മരണശേഷം വളരെക്കാലം കഴിഞ്ഞ് 1953ലാണ്‌ കാഫ്കയുടെ സ്നേഹിതനും അദ്ദേഹത്തിന്റെ കൃതികളുടെ എഡിറ്ററുമായ മാക്സ് ബ്രോഡ് ഈ കത്ത് ആദ്യമായി പ്രസിദ്ധീകരിക്കുന്നത്. തന്റെ ജീവിതത്തിന്റെ വിവിധഘട്ടങ്ങളിൽ താനും അച്ഛനുമായുള്ള ബന്ധം കാഫ്ക ഈ കത്തിൽ സൂക്ഷ്മമായി വിശകലനം ചെയ്യുന്നുണ്ട്. അതികായനും സ്വേച്ഛാധിപതിയുമായ ഒരച്ഛനു മുന്നിൽ സ്വയം ന്യായീകരിക്കാൻ പോലും കഴിയാതെ വായടഞ്ഞുപോയ ശാരീരികവും മാനസികവുമായി ഒരതിദുർബ്ബലനെയാണ്‌ കാഫ്ക സ്വസ്ഥാനത്തു നിർത്തുന്നത്. മകൻ ബാല്യം തൊട്ടുള്ള തന്റെ അനുഭവങ്ങൾ എണ്ണിയെണ്ണി പറയുന്നുണ്ട്: മകനെ ആരോഗ്യവാനും ധീരനുമാക്കാനുള്ള അച്ഛന്റെ ക്രൂരമെന്നു പറയാവുന്ന തന്ത്രങ്ങൾ, ഒന്നു മറിച്ചുനോക്കാൻ പോലും അച്ഛൻ മിനക്കെടാതിരുന്ന തന്റെ സാഹിത്യപരിശ്രമങ്ങൾ, ജൂതസ്വത്വം തേടിയുള്ള അന്വേഷണങ്ങൾ, വിവാഹത്തിനു തടസ്സമായി വരുന്ന ആത്മസന്ദേഹങ്ങൾ. എന്നാൽ ഒടുവിൽ ഈ കുറ്റവിചാരണ ചെന്നുനില്ക്കുന്നത് ഒരു കുമ്പസാരത്തിലാണ്‌: “ഞാൻ എഴുതിയതെല്ലാം അങ്ങയെക്കുറിച്ചായിരുന്നു, അങ്ങയുടെ നെഞ്ചത്തു മുഖം ചേർത്തുകൊണ്ട് കരഞ്ഞുപറയാൻ എനിക്കു പറ്റാതെപോയതായിരുന്നു അതെല്ലാം.” വിവ: വി. രവികുമാർ
96 പേജ്, വില 140 രൂ.
Reviews
There are no reviews yet.