ഒരു പുഴ ദാഹിച്ചുമരിക്കുന്നു

മരിക്കുന്നതിന് എട്ടുമാസം മുമ്പാണ് മഹ്‌മൂദ് ദർവീശിൻ്റെ അവസാനത്തെ പുസ്തകമായ “ഒരു പുഴ ദാഹിച്ചുമരിക്കുന്നു” (അറബിയിൽ ശലഭച്ഛായ എന്ന അർത്ഥത്തിൽ ‘അത്തർ അൽ-ഫറാഷ’ ) പ്രസിദ്ധീകരിക്കുന്നത്. ഡയറിക്കുറിപ്പുകളും ഗദ്യകവിതകളും കവിതാഖണ്ഡങ്ങളും ചിന്താശകലങ്ങളും ഉജ്ജ്വലമായ നിരീക്ഷണങ്ങളും ആത്മധ്യാനങ്ങളും പൂർണ്ണരൂപത്തിലുള്ള കവിതകളുമൊക്കെയുള്ള ഒരു വിചിത്രസങ്കലനമാണ് ഈ സമാഹാരം. കവിതയും ഗദ്യവും തമ്മിലും രൂപഭദ്രതയും ഛന്ദോമുക്തതയും തമ്മിലുമുള്ള അതിർവരമ്പുകൾ കവി മനഃപൂർവ്വം തന്നെ അവ്യക്തമാക്കിയിരിക്കുന്നു. “ഇവിടെ എല്ലാ ഗദ്യവും കൈത്തഴക്കമില്ലാത്തവർ എഴുതിയ പ്രാകൃതകവിതയാണ്; ഇവിടെ എല്ലാ കവിതയും വഴിപോക്കർക്കു സുപ്രാപ്യമായ ഗദ്യമാണ്.”